La quinta Nueche Allunada aporta esti sábadu a Uviéu

La Universidá d’Uviéu acueye esti sábadu día 19 la quinta edición de la Nueche Allunada, una iniciativa impulsada dende toles Facultaes de Ciencies, la OTRI y l’asociación astronómica “Cielos Despejados”, p’averar l’astru más cercanu a la Tierra, la Lluna, a los neños y adultos.

Esta actividá, que cunta col financiamientu y la collaboración de la Fundación Española pa la Ciencia y la Tecnoloxía (FECYT) y el Conceyu d’Uviéu, arrexunta una montonera de talleres y sesiones empobinaes a que los más pequeños puean disfrutar del astru celeste.

Dende les 19 y hasta les 23,30 hores, investigadores de la Universidá d’Uviéu y miembros de “Cielos Despejados” van emponer a los rapacinos na observación d’oxetos celestes con telescopios instalaos nel esterior de la Facultá. La observación va tener llugar nel xardín sur de la Facultá de Ciencies, y a pesar de la presencia de faroles, podrán vese los cráteres de la lluna, dellos planetes y otros oxetos celestes.

Como complementu a la observación astronómica tamién se programaron actividaes de divulgación científica y astronómica como tolos años, nos que puen inscribise los rapacinos momentos antes de qu’entamen. Tol programa d’actividaes pue consultase na web de la OTRI.