Portada Uncategorized La productora y editorial Cuatro Gotes cumple 4 años

La productora y editorial Cuatro Gotes cumple 4 años

by redacción asturnews

La empresa cultural y de comunicación Cuatro Gotes Producciones va celebrar esti vienres 18 de xunu cuatro años d’actividá con un actu nel so estudiu, que por razones sanitaries va poder siguise online.

“Prestaríanos facer una folixa muncho más ambiciosa y presencial con toles persones que collaboren con nós en tou tipu d’iniciatives, pero tendrá d’esperar al quintu aniversariu poles circunstancies sanitaries”, esplica’l director de Cuatro Gotes, Inaciu Galán.

Nel actu van participar el cantante Luis Núñez, que pon música a munchos de los proyectos audiovisuales de Cuatro Gotes, la poeta Susana Sela y el dj Pepiox, que van acompañar al equipu de Cuatro Gotes Producciones nun actu íntimu y que va servir pa celebrar cuatro años dedicaos a l’actividá nel ámbitu de la comunicación y la cultural, con llabor fechu nel ámbitu del cine, radio, televisión, edición de llibros, márketing, formación y una llarga riesta de campos nos que Cuatro Gotes desendolca’l so trabayu.

Nestos años Cuatro Gotes sacó alantre proyectos como’l programa Mundu Sidreru en TPA, la plataforma PlayPresta, premiada con un Premiu Gava, una llinia editorial, les plataforma VerAsturies.com y Formientu.com, la revista VixAst, el ciclu XixónTours, la web de noticies Xixonaldia.com o’l programa de RPA, Sentir Asturies, ente otres munches iniciatives propies y en collaboración con otres entidaes.

“L’actu va celebrase a partir de les siete la tarde y queremos convidar a tol mundu a participar al traviés de les redes sociales, onde vamos emitir dos hores de música, poesía y alcordances d’estos cuatro años d’actividá”, esplica Lluis Fanjul, de Cuatro Gotes Producciones.

Galán esplica les razones de la celebración: “Queremos tener un momentu de celebración y agradecimientu con toles persones que collaboraron trabayando con nós, o cuntando con Cuatro Gotes pa les sos entidaes nestos cuatro años”.

L’enllaz nel que van poder vese l’actividá ye’l siguiente: https://www.facebook.com/CuatroGotes

Tamién te podria gustar