La plaza de Trascorrales acueye la VIII Feria d’Arte Contemporaneo d’Asturies

Cola participación de 17 galeríes, va desenvolvese dende esti xueves 25 al 28 d’esti mes la VIII Feria d’Arte Contemporaneo d’Asturies ARTEOVIEDO 2018, con un programa que s’esparde pel Colexu d’Arquiteutos, el Muséu de Belles Artes y el Salón de Té del Teatru Campoamor.

El conceyal y presidente de la Fundación Municipal de Cultura, Roberto Sánchez Ramos presentó esta selmana, en rueda de prensa, la VIII Edición de la Feria d’Arte Contemporaneo del Principáu d’Asturies, ARTEOVIEDO 2018, acompañáu del director d’esti alcuentru de galeristes asturianos, Iván Dasto.

El conceyal aseguró que “Iván Dasto al pie de la coordinadora de la Feria, Mercedes Ibisate, son bien grandes y consolidaron esta feria que yá se convirtió na Feria d’arte contemporaneo d’Asturies, bien entornada en tolo que se crea nesta rexón. Va Ser del 25 al 28 na plaza de Trascorrales pero amás hai un programa paralelu con conxustes, alderiques –nel Salón de Té del Teatru Campoamor, el Belles Artes y el Colexu d’Arquiteutos- amás actividaes infantiles…Participen 17 galeríes, más la Escuela d’Arte d’Uviéu, un total de 58 participantes. Pa esta Feria, la Fundación Municipal de Cultura invirtió daqué más de 14.000 euros. va inaugurase mañana a los seis de la tarde y va rematar el domingu cola entrega de la Medaya en memoria de Kely”.

Iván Dasto empezó estimando al Conceyu “que faiga posible esta octava edición. Tolo que se pidió apurriósenos”. L’accesu a la cultura y la conocencia ye l’oxetivu fundamental d’esta feria por eso “hai un programa paralelu como xuna manera d’averar esi accesu a la cultura. Ye yá una cita obligada añal del arte contemporaneo asturianu y uvieín. Pasaron por ella más de 30.00 persones y nesta edición va primase’l mecenalgu de los artistes más nuevos. Amás, anguaño llogremos un paridá ente los artistes porque creemos que l’arte contemporaneo ye la memoria d’un pueblu y si nun fuera paritario sería xuna memora sesgada”. El director de ARTEOVIEDO 2018, cavilgó sobro’l coleicionismu y sorrayó qu’esta feria ye “única n’España porque alleguen galeríes rexonales namá, ye un formatu únicu porque pretendemos que s’amuese lo que s’espunxo mientres un añu en nuesa”.

Más información nel dossier de lñ’actividá.