La nueche de San Xuan enciéndese cola música asturiana

La nueche de San Xuan, la nueche más máxica del añu, va encender les sos tradicionales fogueres al son de la música asturiana. Xixón, Llugones, Uvieu, Nava y Mieres, son dalgunes de les ufiertes musicales pa la nueche d’esti vienres na qu’Asturies va danzar alredor de les cenices del fueu y al son de grupos como Lliberdón, Xuacu Amieva, Dixebra o Victor Manuel.

Amás de la multitudinaria propuesta mierense que va traer al veteranu Victor Manuel xunto a Ana Belen, otres ciudaes tamien presentaron el so programa festivu pa la nueche más máxica del añu, que marca’l solsticiu de branu. Asina, la plaza de la catedral uvieína va valir pa presentar el nuevu trabayu de Xuacu Amieva, que va xubir a los escenarios acompañáu de dalgunos amigos y músicos d’excepción, como Ramón Prada, Sergio Fernández, Jorge García, les pandereteres de Dulcamara y les bandes de gaites El Llacín y Naranco, ente otros.

Los veteranos Lliberdón van ser los encargaos de poner música a la foguera xixonesa, que va ser prendida a les doce la nueche na playa de Poniente, mentes que los rockeros Dixebra van facer lo propio en Nava.

Pela so parte, la foguera de Llugones trai a un ampliu repertoriu de músicos asturianos de prestixu. Dende les ocho la tarde hasta la madrugada los sones más tradicionales van llenar el Parque La Paz, de la mano d’artistes tan conocíos como Jorge Tuya, Luis Estrada, Xuan Nel Expósito, Emilio Martínez, La Bandina, McGoldrick, Corquieu y Skama la Rede.