La llingua bretona llega al Liet International de la mano de Lleuwen Steffan

Lleuwen va representar a Bretaña y la llingua bretona nel festival Liet International Asturies 2012 col cantar «Ar Gouloù Bev». La cantante Lleuwen Steffan ye, amás, multillingüe d’una manera especial: nacida y criada nel norte de Gales, vive normalmente en Bretaña, onde aprendió a falar y cantar en bretón. Anguaño, tien una perbona reputación tanto en Bretaña como en Gales y viaxa davezu ente les dos naciones celtes. Musicalmente, ye complicao etiquetar a Lleuwen y, anque tienen dicho d’ella que tien aires de jazz, a esta cantautora tamién-y presta’l rhythm and blues y el rock.

Asturnew sigue asina col repás a los participantes del Liet International, el conocíu como Eurovisión de les llingües minorizaes, qu’esti añu llega a Asturies. Ye la primer vegada nos diez años del festival en qu’esti va celebrase na Península.

La llingua bretona ye una llingua célita mui venceyada al galés, que se fala nel noroeste del estáu francés y que tuvo tradicionalmente mui influencida pol francés. Regulada pola Ofis ar Brezhoneg, ye oficial en Bretaña xunto al galo y al francés, pero’l so futur, con unos 400.000 falantes nun ta garantizáu, yá que ta considerada una llingua en peligru.

Esta ye la torna al asturianu del tema:

LA LLUZ VIVA

Lletra: Lleuwen Steffan

Musica: Lleuwen Steffan

Ama la lluz viva

Quiero descansar nel to suelu

Debaxo del to rellumu

Nel cuartu de la lluna

Ama la lluz viva

Quiero ver cada verdá

Y cada error

Poco a poco

Escucha’l burbús

de la to piel na mio piel

Ama la lluz viva

Conmigo

Ama la lluz viva

Quiero la to lletrecidá

y esplosión

una y otra vez

Ama la lluz viva

Qué aventura

Ente nosotros dos

Somos tu y yo

El mio guapu bretón

Escucha’l burbús

de la to piel na mio piel

Ama la lluz viva

Conmigo