La hestoria de discriminación racial que sufrió un periodista d’incógnitu gana’l premiu de periodismu de la UE

L’artículu “Yo fui esclavu n’Apulia” del italianu Fabrizio Gatti cunta les doloroses condiciones de trabayu de los inmigrantes que trabayen nel sector agrícola de la rexón italiana d’Apulia. El propiu periodista pasó por trabayador y atropó de primer mano y clandestinamente tolos testimonios qu’illustren el so trabayu. El segundu y el tercer premiu fueron a parar a Hungría y Belxica, respeutivamente, demientres qu’una participante de Finlandia ganó’l Premiu Especial pa Xóvenes Periodistes.

El premiu d’esti añu tituláu “Pola diversidá, escontra la discriminación” ye una iniciativa de la Comisión Europea pa premiar a los periodistes que tean un papel activu na llucha escontra les discriminaciones de cualquier tipu. “Los medios de comunicación desempeñen un papel clave a la hora de sensibilizar sobre estes importantes cuestiones. Nun vamos almitir denguna forma de discriminación”, declaró’l comisariu europeu d’Emplegu, Asuntos Sociales e Igualdá d’Oportunidaes, Vladimir Spidla. “Tien qu’aplaudise’l valor y la dedicación d’estos periodistes, pues asoleya qu’urxe siguir lluchando pola diversidá na sociedá”.

“Yo fui esclavu n’Apulia”, asoleyose na revista “L’Espresso”, y narra’l día a día d’un grupu d’inmigrantes empleagaos nel sector agrícola y de como tan sometíos a condiciones llaborales asemeyaes a la esclavitú. Fabrizio Gatti pasó por un d’estos inmigrantes para facer la so investigación y plasmar los resultaos nel so informe. El segundu premiu recayó nel artículu espublizáu por “Nepszabadság Online”,”Nuestra propia hija gitana”, del hüngaru Miklós Hargitai. L’artículu estudia lo trabayusu de l’adopción de persones de grupos minoritarios, nesti casu de xitanos. La belga Petra Sjouwerman, corresponsal de “De Morgen” n’Escandinavia, ganó’l tercer premiu pol so artículu “Empresa contrata esclusivamente persones autistes”, qu’estudia en que midía “ser diferente” ye una ventaya.

Por otra parte, el Premiu Especial pa Xóvenes Periodistes d’esta tercer edición del concursu fui a parar a manes de la finlandesa Henna Helne pol so artículu “Madres que deprenden l’idioma de los sos fíos”, asoleyáu na revista “Anna”. El trabayu alfruenta’l tema de la integración dende una óptica optimista y trata de sensibilizar al llector sobre la discriminación por motivos d’edá, sexo y orixen etnicu.

Los ganadores y finalistes fueron escoyíos por un xuráu de profesionales de los medios de comunicación y espertos na llucha escontra la discriminación tres de facer una gran criba ente los 568 participantes de tolos Estaos Miembros demientres que pal premiu especial hubu un total de 125 candidatures. Los trabayos fueron evaluaos en función del so valor periodísticu, la profundidá de la investigación y la orixinalidá

Páxina web de la Comisión Europea escontra la discriminación