La Generalitat alienda’l móvil en catalán

La Generalitat de Catalunya ta desenvolviendo embaxu’l nome de “Elteumobil.cat” una campaña pa alendar la telefonía móvil en llingua catalana. Pa llograrlo, na web de la campaña úfrese información de los terminales qu’hai en catalán nel mercáu y per cuales operadores pues alquirilos. Tamién permite conocer qué servicios y aplicaciones de la Generalitat de Catalunya y de la Corporació Catalana de Ràdio i Televisió Interactiva puen usase col móvil. Y pa divertise, Elteumobil.cat ufre tres xuegos de móviles de castellers en collaboración con http://www.eljoccasteller.cat/. La campaña Elteumobil.cat surde de l’alcuerdu robláu l’añu 2007 ente’l Departament de Governació i Administracions Públiques, los fabricantes Nokia, Motorola, Alcatel y Sony Ericsson y les operadores Movistar, Vodafone, Orange y Yoigo. Con esti alcuerdu, per un llau, los fabricantes comprométiéronse a incorporar progresivamente’l catalán nos menús de los terminales enantes del 31 d’avientu de 2008 y, per otru llau, les operadores comprometiéronse a demandar a los fabricantes la presencia del catalán como requisitu pa homologar los terminales pa comercializalos. Agora’l Parllamentu galés va imitar esti entamu pa esparder la normalización del galés, llingua oficial de Gales xunta l’inglés, falada per un 25 % la población.
Elteumobil.cat