La Fundación Príncipe d’Asturies diz que’l Film Center de Woody Allen sigue alantre

El proyectu cultural entamáu pola Fundación Príncipe d’Asturies en colaboración col realizador Woody Allen col oxetivu de difundir el cine d’autor sigue alantre, según declararon a diversos medios asturianos fontes de la institución que preside Graciano García. El Film Center, sicasí, ye inda una iniciativa sobre la que poco se sabe, a nun ser que va tener la so sé n’Uviéu y según caltién la FPA, que’l so empiezu va ser realidá l’añu qu’entra.

La Fundación informó a dellos medios asturianos del alcuentru calteníu ente representantes de la institución y el cineasta Woody Allen pa perfilar el Film Center anunciáu va unos meses. El proyectu taría ya bien adelantráu, según les fontes de la FPA, y el niuyorquín aportara tamién les sos propies idees a la iniciativa nuna xinta celebrada n’Uviéu con representantes de la institución asturiana.

Alrodiu de los oxetivos y conteníos d’esti foru pa la difusión del cine non comercial ye bien poco lo qu’inda se sabe. Paez ser que les sos actividaes centraríense n’organizar ciclos de proyecciones y un eventu añal cola participación de dalguna estrella internacional del mundu del cine. La so sé va ser Uviéu y les sos actividaes espardiríense a otros llugares d’Asturies. L’asuntu de la financiación del futuru Film Center ye otru de los asuntos sobre’l que nun afondaron tovía los responsables de la Fundación Príncipe d’Asturies.