Portada Educación La FP va ser dual, con más práctiques y contratu pa parte de los alumnos

La FP va ser dual, con más práctiques y contratu pa parte de los alumnos

by redacción asturnews
Foto: Irekia (https://www.flickr.com/photos/irekia/)

Un proyectu ambiciosu, que tien como exes principales la formación dual, la innovación y l’orientación ye como pue resumise la nueva Llei Orgánica d’Ordenación ya Integración de la Formación Profesional, de la qu’enagora se presentó l’anteproyectu, en pallabres del director xeneral d’Enseñances Profesionales, Javier Cueli.

El Gobiernu marcárase como oxetivu tresformar la FP, convertila nun itinerariu de primer nivel y allo va empuestu’l testu, con un cambéu importante de conceutu, sigún destaca Cueli y que pasa porque tola FP va ser considerada dual. Hasta agora falábase de Formación Profesional, que n’Asturies cursen más de 17.000 moces (ente Graos Medios y Superiores presenciales y a distancia, y la FP Básica). y per otru llau de la FP Dual, la modalidá puesta en marcha va unos años y que nun consiguió espuntar. Esta modalidá, que contempla la realización d’ente 660 y 1.000 hores de práctiques nos centros de trabayu, atopase nesti cursu n’Asturies nel so VII Programa, que s’imparte en 22 centros y cuenta con 169 alumnos y 127 empreses collaboradores. El 64%de los estudiantes son de graos cimeros y el restu, de medios. Hai un datu llamativu: solo’l 15% d’esos 169 estudiantes cunta con una beca per parte de les empreses, opción que ye voluntaria y que na mayoría de les ocasiones sirve pa cubrir, por casu, los gastos de tresporte.

Cueli, qu’ufiertó toos estos datos na I Feria de Formación Profesional Dual, en Morcín, almite que les cifres son «ameyorables», anque tamién xustifica que la llectura nun ye tan senciella como quedase col baxu porcentaxe d’estudiantes y empreses qu’opten por esta modalidá. De primeres, porque anguaño ta condicionáu poles llimitaciones de les mesmes empreses poles midíes de seguridá énte la covid y, amás, porque «los qu’opten pola formación a distancia tampoco pueden faelo; los que nun aprueben el primer cursu tampoco y en families como hostelería y turismu en difícil que faigan dual porque los alumnos prefieren trabayar nos meses de branu».

La FP Dual enxamás nun consiguió grandes porcentaxes, nin n’Asturies nin n’España. Pero la nueva llei lo que fai ye reconocer «que toa la FP ye dual». Va haber dos modalidaes: en primer llugar la FP Dual xeneral, qu’aumenta llixeramente’l periodu d’estancia n’empreses. Si agora’l mínimu ye d’un 20%, dempués va ser d’ente un 25 y un 35% de la duración total de la formación. La fase dual va distribuyise a lo llargo de tolos cursos, ensin calter llaboral. Ye lo más paecío, por tanto, a lo que conocemos agora.

Dempués va tar la FP Dual avanzada, que va tener una formación n’empresa d’ente’l 35% y el 50% del total de la formación y, como novedá, va establecese una relación contractual del estudiante cola entidá. «Lo importante ye qué s’apriende y non ónde s’apriende», incide Javier Cueli, qu’aportuna na idea de que «hai que salir del bucle de qu’hai xuna FP bona y xuna mala».

Asturies participó na primer xunta col ministeriu, pa dir esbillando’l testu. Les comunidaes tán citaes el día 25 pa presentar les sos propies aportaciones.

Tamién te podria gustar