La fin de selmana llega col VII Certame de Gaita ‘Gaiteru Llibardón’ y la IV Noite Celta d’Ibias

Redacción.

Mañana sábadu a les once la nueche en Santantolín, capital del conceyu d’Ibias, va celebrase una de les cites más esperaes del calendariu musical del occidente asturianu. Y esti añu los encargaos d’animar la fiesta son Xuacu Amieva, Felpeyu y Blima. Pero enantes d’esta Noite Celta, güei mesmo, pue disfrutase del VII Certame de Gaita ‘Gaiteru Llibardón’.

Lliberdón acueye’l VII Certame de Gaita ‘Gaiteru Libardón’ a les siete y media na Plaza de Chile de Llibardón, en Colunga. El Certame entámalu tolos años l’Asociación Cultural y de Festexos ‘San Roque’, col sofitu del Conceyu de Colunga.

Les categoríes del certame son infantil (hasta 14 años) y mozos-adultos (dende los 15 años). Tolos participantes tienen de tocar dos temes llibres y almítense composiciones propies. Los premios son, pa la categoría infantil, de 120 euros pal primeru, 60 euros pal segundu y 30 euros pal terceru. Na categoría de mozos y adultos, el primer premiu ye una gaita asturiana fecha por Miguel Alonso Cachafeiro, el segundu ye de 150 euros, y el terceru ye de 100 euros.