La esposición “La ruta de les estrelles. El Camín de Santiago na Edá Media” llega a Tinéu

La esposición “La ruta de les estrelles. El Camín de Santiago na Edá Media”, producida pel Área de Cultura del Conceyu d’Avilés al traviés del Muséu de la Hestoria Urbana, llega a una de les localidaes de mayor tradición xacobea d’Asturies, Tinéu, etapa clave nel Camín Primitivu a Compostela.

L’amuesa, itinerante polos distintos conceyos asturianos polos que trescurren los distintos caminos de Santiago, inauguróse’l pasáu día 2 de payares, na sala d’Esposiciones de la Casa de Cultura de Tinéu, asitiada nel Palaciu del Conde de Campumanes, na capital municipal. Va Permanecer abierta hasta’l llunes 15 de payares.

Cola posa en Tinéu, la esposición sigue’l so percorríu espositivu nesti inusual bienio xacobéu, al traviés de los distintos conceyos asturianos polos qu’escurren los caminos con destín a la catedral compostelana. Al traviés de Tinéu desenvuélvese una de les etapes fundamentales nel conocíu como Camín Primitivu, que cunta con finxos tan importantes, amás del propiu cascu históricu de la capital cuartana, como’l Monesteriu de Obona.

Con esta cita, son yá dolce los conceyos d’Asturies nos que tuvo espuesta, quedando pindia, enagora, La Puela Ayande, el so próximu destín, otra de les etapes que componen la ruta primitiva, d’Uviéu a Santiago.

La Casa de Cultura de Tinéu, Conde Campumanes, atopase na cai Mayor, 25. Y el horariu de visita, gratuita, ye de llunes a vienres, de 10.00 a 13.00 y de 15.00 a 19.30 hores.