La Ería n’Uviéu acueye una nueva edición de Pequemprende

Empobinaos a neños y neñes d’ente 8 y 12 años, esti branu ufiertaránse dos campus que se van celebrar ente los díes 18 y 22 de xunetu y del 8 al 12 d’agostu dientro d’una nueva edición de Pequemprende.

El conceyal d’Economía y Empléu, Rubén Rosón, presentó esta selmana una nueva edición de los campus “Pequemprende”, nos que s’escuerre xenerar esperiencies de emprendizaje social y fomentar la cultura entamadora ente los más neños. El conceyal empezó la so intervención calificando de “perimportante” el fomentu de la cultura innovadora y la conocencia ente los  más pequenos, porque los neños, aseguró, “aprovechen  como naide” esti tipu d’esperiencies y aprendizaxe.

El conceyal siguió la so intervención indicando qu’esta iniciativa vien arredondiar “un branu como nunca hubo n’Uviéu”, nel que conflúin ensame d’actividaes infantiles, según congresos y simposios, que conviden a la xente a quedase y a visitar Uviéu tamién en vacaciones. Rosón nomó, ente otros curiosos pal turismu, el  Festival de Branu’, qu’ufierta cine al campu nos barrios y una curiosa programación teatral. El conceyal concluyó indicando que toa esta ufierta fai qu’Uviéu, “sía más visible, más habitable”, lo qu’ensin dulda ye una bona noticia pal turismu de la ciudá, que como recordó, yá ameyoró notablemente na primer metá del añu, con una medría de más del  10% nel númberu de visitantes, según datos del Institutu Nacional d’Estadística.

Rosón compareció ante la prensa acompañáu por  David Sotu, de la empresa Y2, responsable de la organización del campus d’esti branu y de Pelayo Álvarez y Silvia de Oliveira, representantes de l’Asociación  Nueves Empresarios, FOLIE, quien detallaron los pormenores del campus. Empobinada a neños d’ente 8 y 12 años, la iniciativa va desenvolvese, de primeres, ente los díes 18 y 22 de xunetu, y va tener ente’l 8 y 12 d’agostu, una segunda edición. En caúna d’elles, van  poder participar ente 12 y 15 neños.

Nel campus, que se va desenvolver nel Espaciu Coworking de La Ería n’horariu de 9:30 a 14:00 hores, los pequeños van aprender tolos pasos necesarios pa crear una empresa, pa lo que van tener que realizar un  brainstorming, desenvolver un plan d’entamadores y aprender a trabayar n’equipu.