La editorial Espulizastur crea’l clú de llectores “Llibros de Nós”

La editorial Espublizastur, qu’espubliza la revista “La Sidra” y asoleyó llibros como la “Guía Sidrera” y “La Nación Asturiana” ta acabante de facer pública una iniciativa nueva, “Llibros de Nós”, un clú de llectores que, comenten los responsables, “ñaz col enfotu d’apostar pola independencia, entendida como respuesta a una dinámica editorial que n’Asturies ta cada vuelta más condicionada poles subvenciones y como una manera d’ufiertar, dende la cultura de nueso, materiales de llectura alloñaos del pensamientu únicu que controla’l mercáu del llibru”.

La dinámica del clú de llectores Llibros de Nós ye mui asemeyada a la d’otres organizaciones como’l clásicu “Círculo de lectores”, el sociu nun ha pagar nada por apuntase nin por siguir nel clú, l’únicu requisitu ye’l de mercar diez llibros al añu d’ente los que la editorial vaiga ufiertando nel so catálogu. Sobre los llibros que van ufiertase, el responsable de Llibros de Nós, Fonsu Álvari, comenta que “non solo se van ufiertar llibros asoleyaos por Espublizastur, sinón que cuntará tamién con trabayos d’otres editoriales y d’estremaos coleutivos sociales”.

No que cinca a los proyectos de la editorial encargada del proyectu “trabayaráse especialmente en dos ámbetos malapenes atendíos anguaño, como son l’ensayu y la producción científica”, nesi sen preparen yá nuevos trabayos pa los meses vinientes.

N’apuntándote al clú los gastos d’unvíu son de baldre en casu de facer el pagu per cuenta bancaria o con tarxeta de créditu, pa los reembolsos cobraránse dos euros por unvíu. Amás, la editorial proyecta importantes descuentos d’alredor del 20 % nel preciu de los llibros ufiertaos, un llibru de regalu al facete sociu y cada añu que se renueve la suscripción d’un sociu.

El tiempu mínimu de pertenencia a Llibros de Nós ye d’un añu. D’ente tola ufierta editorial del clú de llectores, los socios han mercar “lo que vien a ser un llibru al mes, sacantes los meses de xunetu y agostu”. Tolos meses, de nun producise un pidíu alternativu enantes del día diez, “Llibros de Nós unviará’l llibru mensual recomendáu.”

Dientro de bien poco va poder consultase tola ufierta del clú na páxina www.llibrosdenos.com o pidir el catálogu en papel, al traviés del corréu lletrónicu llibrosdenos@hotmail.com . La editorial tien abierta yá la posibilidá de facese sociu, pa lo qu’han unviase los datos qu’apaecen nel pdf que s’axunta a esta noticia.