La EBAU va ampliar les sos sedes a Siero y Llangréu

La EBAU podría ampliar les sos sedes a Siero y Llangréu, una midida qie dexaría ameyorar la distribución de parte de los 2.000 aspirantes que s’esaminaríen n’Uviéu y facilitar la movilidá de quien moren nesos conceyos.

Siero y Llangréu podríen sumase a los conceyos asturianos onde se celebra la Evaluación del Bachilleratu para l’Accesu a la Universidá (EBAU). La propuesta d’ampliar les sedes onde se realicen les pruebes surde de la xunta telemática caltenida güei ente la Universidá d’Uviéu y la Conseyería d’Educación p’avanzar na planificación de les sedes y protocolos de seguridá de la EBAU.

La midida dexaría redistribuir una parte de los 2.000 aspirantes que s’esaminaríen n’Uviéu y facilitaría la seguridá y la movilidá de quien moren nesos conceyos. Asina, a les yá conocíes sedes d’Uviéu, Xixón, Avilés, Mieres, Cangas, Tapia y Ribesella sumaríense agora les de Siero y Llangréu.

Mientres l’alcuentru, tamién s’avanzó na planificación de la prueba y na ellaboración del protocolu de seguridá que l’arrodia y que tán ellaborando les y los técnicos de prevención de la Universidá d’Uviéu y del Principáu cola collaboración de la Delegación del Gobiernu, cola supervisión de la Conseyería de Salú. Mientres esta selmana van llevar a cabu visites a les distintes instalaciones per parte de la vicerrectora y la directora xeneral pa evaluar, in situ, los recursos y les necesidaes de les distintes sedes.

Les especiales característiques de la preba, nes presentes circunstancies, riquen d’una especial coordinación y la movilización de más recursos que nuna situación de normalidá.

La convocatoria ordinaria de la prueba d’Evaluación del Bachilleratu pal Accesu a la Universidá (EBAU), a la que tán llamaos unos 4.000 estudiantes, va tener llugar los díes 30 de xunu y 1 y 2 de xunetu y la convocatoria estraordinaria va celebrase los díes 21,22 y 23 de xunetu.