La Cultural XIxonesa sofita a los estudiantes d’Inxeniería

La Sociedá Cultural Xixonesa facíase ecu esti llunes de la llucha entamada polos estudiantes d’Inxeniería de Xixón, zarraos na biblioteca del Edificiu Polivalente pa evitar el so pieslle definitivu. Los estudiantes de la nuesa Universidá d’Uviéu nun solamente sufren los ataques del Ministeriu d’Educación, n’opinión de la sociedá, “col amenorgamientu de beques y la xubida de tases, que fae que munchos fíos de trabayadores tean siendo obligaos a abandonar los estudios superiores, sinón que tamién se conxelen nunes aules ensin apenes calefacción. Amás, apocayá tuvieron qu’arrenunciar a bona parte de los servicios de reprografía”.

Sigún la Sociedá Cultural Xixonesa “lo último per parte del Gobiernu de la Universidá ye desaniciar esta biblioteca ensin siquier consultar al alumnáu y ello tuvo la rempuesta contundente de los estudiantes, que lleven zarraos dende’l vienres torgando la salida de los fondos bibliográficos”.

La Sociedá Cultural Xixonesa, como entidá comprometida con Xixón, quier comunicar el so refugu total al pieslle d’un serviciu que puede ser esfrutáu por cualisquier ciudadanu de la nuesa ciudá y sofitar a estos estudiantes que nos tán dando un exemplu de ciudadanía al defender de forma seria y comprometida un equipamientu cultural.