La continuación de ‘It’ va estrenase en septiembre de 2019

La cinta de terror ‘It’ dirixida pol arxentín Andrés Muschietti, va tener una continuación que va llegar a les sales en septiembre de 2019, informó esti martes l’estudiu Warner Bros nun comunicáu.

Muschietti fixo hestoria col rompedor estrenu de la película n’Estaos Xuníos, onde algamó los 123,1 millones de dólares, el meyor debú rexistráu para un filme de terror. De magar, la película convirtióse na de mayor recaldación na hestoria dientro del xéneru de terror, siempres y cuando nun s’afaigan les cifres pola inflación.

En 1973 The Exorcist ingresó 233 millones de dólares n’Estaos Xuníos pa un total de 441,3 millones en tol mundu. La película de Muschietti, na actualidá, lleva acumulaos 266,1 millones de dólares n’EEXX para un total de 478,1 millones.

It, con un presupuestu d’unos 35 millones de dólares, cunta cómo un grupu de neños fai frente a l’amenaza de Pennywise, un payasu con un tarrecible historial de violencia y asesinatos, que la so presencia afecta a la localidá de Derry. Bill Skarsgard, Finn Wolfhard, Jaeden Lieberher y Sophia Lillis son los protagonistes de la cinta. La continuación va xirar en redol a esos mesmos personaxes, yá como adultos.