La Conseyería d’Educación adxudica otres 190 places d’interinos

La Conseyería d’Educación adxudicó esta selmana una nueva convocatoria pa cubrir places nos centros públicos. En concretu, unes 190 vacantes de les que dalgunes son pa cubrir sustituciones, anque otra parte con places que taba previstu convocar dende principios de cursu, “pero que les retrasaron tol mes pa pagar menos nómines”, según fontes sindicales.

Les cifres de contrataciones fueron oxetu de discutiniu dende’l principiu. Ente que la conseyería afirmó que se contrataron 860 docentes solu pa les aules covid y que la plantiya ye bien cimera a otros años, los sindicatos dixeron que nun-yos salen les cuentes. El PP aludió a esta cuestión na Xunta y aseguró que “solo hai 312 contrataciones más que’l cursu pasáu. Munches, a media xornada”.

Per otru llau, los problemes col tresporte escolar que’l vienres acabaron cola paciencia de la directiva del IES Llanera de Posada -que terminó presentando’l so arrenunciu- podríen llegar al so fin güei mesmu. Según el director del centru, Carlos Suárez, la conseyería informó de que la incompatibilidá d’horarios surdida nos díes previos a la vuelta a les aules taría, en principiu, solucionada. En Xixón, nel Montedeva hai dos clases de terceru de Primaria aisllaes y, a última hora de la tarde, el Príncipe d’Asturies informó de que la sustituta de la tutora d’un aula de 4 años n’Infantil volvió dar positivu na segunda PCR. L’aula queda aisllada, a la espera de la PCR.