La conceyalía d’Urbanismu del conceyu d’Uviéu prioriza les obres plantegaes por Educación y concede dos llicencies d’obres en colexos

La conceyalía d’Urbanismu y Mediu Ambiente concedió la llicencia de dos obres en colexos d’Uviéu, priorizando asina les obres plantegaes al Conceyu dende la conseyería d’Educación. El conceyu acaba de dar lluz verde les llicencies d’obres p’acometer la reforma del aulariu d’infantil del colexu públicu de La Corredoria y del zarru perimetral del colexu públicu Veneranda Pumar.

Ignacio Fernández, conceyal d’Urbanismu y Mediu Ambiente del conceyu d’Uviéu, esplica que “dende esti departamentu esperamos que nos próximos díes podamos dir informando de la concesión de les restantes obres d’equipamientos educativos”.

Les llicencies yá concedíes, entaináronse por que puedan llevase a cabu les obres coincidiendo col periodu non lectivu. “Tratase de dos obres prioritaries y l’idea ye que cuando los alumnos tornen a les aules en septiembre yá dispongan de les instalaciones dafechu anovaes”, matizó’l conceyal d’Urbanismu.

Amás, tamién hai una tercer llicencia d’obra en marcha, la correspondiente a la reforma del accesu municipal y aseos del Conservatoriu Superior de Música Eduardo Martínez Torner. “La llicencia municipal ta concedida pero al tratase d’un edificiu protexíu falta que la Conseyería de Cultura dea’l vistu bonu a la obra, por que pueda empezase cola reforma del edificiu”, concretó’l conceyal d’Urbanismu.