La comunidá universitaria escueye sos representantes nel Claustru

La Universidá d’Uviéu escoyó esti martes 15 a los miembros que van componer el nuevu Claustru de la institución académica asturiana. 

Les meses electorales permanecieron abiertes dende les 10 hasta les 19 hores con datos de participación provisionales por colectivu bien desemeyaes: la más alta rexistróse ente profesores doctores con vinculación permanente (71, 5%) y la más baxa ente los estudiantes de doctoráu o tercer ciclu (2%). La participación total foi de 11,89%.

El Claustru ye’l máximu órganu de representación de la comunidá universitaria y ta formáu pol rector, la secretaria xeneral, el xerente y trescientos miembros escoyíos d’ente los distintos sectores de la comunidá universitaria. Les elecciones al claustru convoquen cada cuatro año y la so xunta ordinaria en plenu celébrase, siquier, una vegada al añu.

Correspuende al Claustru la reforma total o parcial de los estatutos de la Universidá y conocer les sos llínees xenerales d’actuación, amás de proponer iniciatives al Conseyu de Gobiernu, aldericar l’informe añal sobre la institución presentáu pol rector, escoyer al defensor universitariu y convocar elecciones estraordinaries a rector, ente otres competencies.

Por colectivu, el claustru ta compuestu por 165 representantes del sector A, profesores doctores con vinculación permanente; 30 representantes del sector B, integráu pol restu del personal docente ya investigador (12 representantes del colectivu B1, profesores con vinculación permanente funcionarios non doctores; 13 representantes del colectivu B2, personal docente ya investigador ensin vinculación permanente a tiempu completu; y 5 representantes del colectivu B3, personal docente ya investigador ensin vinculación permanente a tiempu parcial); 75 representantes del Sector C, integráu por estudiantes (72 estudiantes de grau o master o de primeru y segundu ciclu, y 3 representantes d’estudiantes de doctoráu y tercer ciclu); y, finalmente, 30 representantes del sector D, correspondiente al personal d’alministración y servicios.