La Col.la Propinde presenta “A Teyavana” en La Pola L.lena

El célebre grupu asturianu de folk-fusión La Col.la Propinde, presenta esti próximu domingu 28 de Marzu, el so tercer trabayu discográficu, “A Teyavana”.La cita va ser nel Teatru Vital Aza de La Pola L.lena a partir de les 19.30 hores. L’actuación va tar enllena de sorpreses. El discu, asoleyáu por Algamar Producciones inclúi doce cantares, amestando la composición propia cola reellaboración tradicional.

Nesta ocasión, el grupu cunta cola collaboración d’Esther Fonseca, que pon voz al cantar “2417”. “A teyavana” foi grabada nos estudios Tutu ente mayu y setiembre, cola producción de Sergio Rodríguez y Ánxel González.

Otra vuelta l’aire sele vuelvi ruxir y otra vegada les músiques y les lletres de La Col.lá Propinde vuelven anubrir l’espaciu musical n’Asturies, esta vegada gracies a la “teyavana”: unes lletres y unes músiques espuestes a los cuatro vientos, como si d’una nueche de branu se tratara, componiendo idees col rellumu de les estrelles peneraes nel llar so les maderes y téxaslos del techu. Dormir, suañar “a teyavana”, a cielu raso ente téxasles.

Ente la biografía de La Col.lá Propinde, destaca’l premiu al meyor cantar n’asturianu nel añu 2003 por “L’emigrante”, amás, los sos temes diéronse a conocer en tol estáu cuando a lo llargo del añu 2009 fueron banda sonora de la serie d’Antena3 “Doctor Mateo”.

Páxina web del grupu