La Berlinale camuda de planes y prepara una edición virtual

La Berlinale va camudar de planes y va arrenunciar a celebrar una edición presencial énte l’empeoramientu de la pandemia de coronavirus n’Alemaña, qu’obligó a aplazar el festival de cine hasta marzu con un formatu dafechu virtual, según una esclusiva de la revista Variety.

El mediu d’información cinematográfica y el diariu The Hollywood Reporter citaron a fontes cercanes a la organización qu’aseguren que se refugó dafechu la celebración en persona. L’anunciu oficial va llegar a finales d’esta selmana, aseguren.

Amás, la Berlinale va aplazar les sos feches primeramente previstes, del 11 al 21 de febreru de 2021, a otres pal principiu de marzu. L’eventu paralelu a l’amuesa, el European Filme Market (EFM), va siguir los mesmos pasos.

Hasta agora, la organización embaraxaba un segundu plan pa celebrar el festival n’abril, pero finalmente refugóse porque la instituciones públiques alemanes que lu financien nun quieren comprometese a unos costos que raspien los 30 millones d’euros (según Variety) ensin tener certidume de cuál va ser la situación entós.

Ente otres razones, el diariu remanó que munches sales de cine europees esperen l’arranque de la primavera p’abrir los sos negocios y nun quieren arrendar los sos espacios pa eventos como esti énte la hipotética llegada de grandes estrenos.