L’Academia de la Llingua Asturiana asoleya una entrega nueva de la coleición Toponimia

La parroquia d’Aces, del conceyu de Candamu, ye la última de les parroquies cola toponimia asoleyada dientro de la coleición de l’Academia de la Llingua Asturiana, “Toponimia”. Col númberu 119 la recopilación ta basada nel trabayu de campu con entrevistes orales que ficieren los hestoriadores Andrea Miranda Duque y Juan Ignacio Santos Rodríguez. Miranda espublizare yá nesta coleición, nesti casu con Alejandro Rodríguez Alonso, la toponimia de la parroquia d’Agüeria, asitiada n’Uviéu..

Nos cartafueyos d’esta coleición apaecen los nomes de la toponimia menor de les parroquies: praos, tierres, cases, llugares, regueros, fontes, zones, barrios… y una pequeña descripción de caún de les entraes. Nesti casu la parroquia tien namás un pueblu, Aces, que ta espardíu per La Sierra Piedrafita. Dientro d’él estrémense dellos barrios: Barréu, La Cai, Forna, El Pueblu y El Sucu. Tien amás una parte de la parroquia nel pueblu de La Mortera, llugar que tamién comparten les parroquies de San Tisu y Praúa.

Con esta obra yá son dos les parroquies del conceyu de Candamu espulizaes na coleición Toponimia: Aces y El Valle. El próximu númberu de la coleición va tar dedicáu a la parroquia de La Collá, asitiada en Siero y tien por autores a Marta Lozano Carbajal ya Inaciu Galán.