Joaquín Pixán canta a les poetes asturianes con música de Ramón Prada y Jorge Muñiz

El cantante líriu Joaquín Pixán ta estos díes trabayando nun nuevu proyectu discográficu nel que pon voz a los poemes de seis poetes asturianes. Los versos de Nene Losada, Taresa Lorences, Lourdes Álvarez, Berta Piñán, Esther Prieto y Vanessa Gutierrez foron musicaos polos compositores Ramón Prada y Jorge Muñiz, nun trabayu pensáu pa voz y pianu, de la mano de Carmen Yepes. El discu tamien cuenta con dos obres pa cello y una pa la flauta con Jose Ángel Hevia.

Joaquín Pixán, que yá punxere la so voz a los poemes d’Angel González, aseguró qu’esti ye ‘un proyectu d’asturianos p’asturianos’. El trabayu que saldrá a la lluz nos prósimos meses ta producíu y pensáu pol propiu Pixán.

Pela so parte, Ramón Prada y Jorge Muñiz son dos compositores de prestixu internacional que s’encargaron nos últimos meses de trabayar sobre los testos de les poetes asturianes pa pone-yos música. Prada foi l’encargáu de componer pa les palabres de Berta Piñán, Lourdes Álvarez y Esther Prieto, mentes que Jorge Muñiz, que trabaya como catedráticu de composición nuna Universidá de los Estaos Uníos, fixo lo propio colos de Nene Losada, Lourdes Álvarez y Vanessa Gutierrez.