La XDLA pide a les TV locales un apueste pola programación n’asturianu

La Xunta pola Defensa de la Llingua Asturiana (XDLA) acaba d’unviar una carta a les televisiones locales nueves que tán principiando emisiones, yá sía al traviés de la TDT o de Telecable pa que faigan un apueste pol asturianu. Na carta, esplícase a los responsables de les cadenes l’éxitu de los programes nel nuestru idioma emitíos per otres televisiones locales y pola mesma TPA, amás de recorda-yos que pa que les ufiertes nueves se consoliden y tengan éxitu ente los espectadores tienen qu’ufrir lo que nun puen ver nes televisiones d’ámbitu estatal.

La XDLA acuta esta ufierta en “formatos nuevos, espacios culturales y programación en llingua asturiana, dalgo que va xustificar que l’audiencia sintonice una canal que va tener una ufierta de programación muncho más pequeña y modesta -dalgo que nun tien que significar menos dignidá y menos calidá- que les televisiones qu’emiten dende Madrid”.

De la mesma manera, la XDLA quier aprovechar pa recorda-y al Gobiernu asturianu que bien llueu va tener que convocar un repartu nuevu de llicencies de TDT -l’anterior foi un desastre y supunxo la desaparición de la ufierta televisiva privada asturiana-. Por eso, recuerda que nes demás autonomíes con llingua propia les alministraciones valoraron el porcentaxe d’emisión nel idioma propiu. Sicasí, nel so momentu, l’Alministración asturiana nun tuvo esto en cuenta nin pa la llicencia d’ámbitu autonómicu nin pa les d’ámbitu local.

Según desplica la XDLA “por exemplu, en Cataluña p’algamar una concesión había qu’emitir un mínimu del 50% en catalán. Esto permitió protexer les televisiones yá existentes, con munchos años al llombu n’antena, ya impedir la penetración de redes estatales de televisión local. Tolo contrario de lo que se fixo n’Asturies. Otra manera, el Plan de Normalización de la Llingua Gallega fala d’alcordar coles locales una medría nel empléu del idioma propiu y la emisión de películes doblaes. Amás, diz que nel repartu de llicencies va tenese en cuenta l’usu del idioma. Per otru llau, el Gobiernu vascu decidió que na axudicación de llicencies de TDT diba tenese en cuenta’l porcentaxe d’emisiones en vascu, amás de reservar una llicencia pa la emisión dafechu nesti idioma en cada demarcación”.

Ente les propuestes que fai l’asociación de defensa del idioma, atopase la necesidá de buscar un equilibriu ente la ufierta privada y pública, pa los que “la TPA podría ayudar a que les locales cumplieren una serie de mínimos de conteníu y perfil llingüísticu. Nesi sentíu, la cadena pública podría collaborar con otres emisores pa producir conteníos, dalgo que valdría pa xenerar una rebaxa de los costos y una especialización –non toles emisores implicaes van tener que producir los mesmos programes–. Asina, cola collaboración ente TPA y les televisiones locales podría consiguise un horariu d’emisiones más variáu y que permitiera algamar niveles d’audiencia más altos. Esta collaboración tamién permitiría xenerar un archivu del audiovisual n’asturianu custodiáu pola televisión pública”.