IX y Podemos van defender con una iniciativa conxunta la escuela pública

IX y Podemos van defender con una iniciativa conxunta la escuela pública, al traviés d’una Proposición Non de Llei na que van pidir tamién una moratoria d’un añu na execución de la revisión de los conciertos.

El grupu parlamentariu d’IX xuntu al de Podemos na Xunta Xeneral ficieron anuncia esti viernes de que van defender nel parlamentu una Proposición Non de Llei en defensa de la educación pública.

Esta iniciativa demanda la inmediata aplicación d’una moratoria d’un añu na execución de la revisión de los conciertos educativos con centros privaos d’enseñanza demientres s’algama un mínimu d’estabilidá lexislativa, tal que se fizo na Comunidá Autónoma de Navarra. IX y Podemos quieren qu’esti procesu “se faiga de forma tresparente, que porte l’establecimientu de criterios claros qu’entamen el procesu, incluyendo la necesaria presencia de representantes de la comunidá educativa de la escuela pública nesi procesu, lo que redundaría nuna mayor tresparencia del mesmu, facilitando los datos correspondientes tantu a los grupos parlamentarios como AMPAS y a les organizaciones sindicales de la rede pública que les soliciten”.

Esta iniciativa foi presentada na mañana d’esti vienres pola responsable de Movimientos Sociales d’IX, Mayka Barros, y la diputada de Podemos, Lucía Montejo, xuntu al voceru del Movimientu Social pola Escuela Pública, Luis Fernández. Barros recordó que la defensa de la enseñanza pública ye una seña d’identidá d’IX y que la llei actual, la LOMCE blinda’l calter prioritariu de los conciertos educativos.

La responsable d’IX recordó qu’anguaño los conciertos dexen destinar fondos públicos a subvencionar centros privaos que segreguen los alumnos por sexos, lo que constitúi una “trumpización de la educación” y tresmite unos valores que nun son tolerables “nin política nin pedagóxicamente”. Fernández, pela so parte, aseguró que’l mayor riesgu que cuerre la educación pública ye la privatización y la esviadura de los fondos públicos que tendríen de financiala a la privada.

Luis Fernández convidó a quien comparte la defensa de la escuela pública a sumase a una paragüada que se va realizar el día 31 en Xixón, a les 18.30 hores, con salida del Paséu de Begoña.