IX y Podemos encamienten al Gobiernu a amenorgar l’horariu lectivu del profesoráu en Primaria y Secundaria

IX y Podemos encamienten al Gobiernu a amenorgar l’horariu lectivu del profesoráu en Primaria y Secundaria porque, amás de reponer les condiciones llaborales de 2012, la midida significaría meyores na calidá de la enseñanza pública y en beneficiu de la inclusión y l’atención a la diversidá.

Los grupos parlamentarios d’IX y Podemos encamienten al Conseyu de Gobiernu a amenorgar, con calter inmediatu, el númberu de sesiones lectives del profesoráu de Primaria y Secundaria, hasta un máximu de 23 y 18 sesiones selmanales respectivamente, na llínea de recuperación de derechos que se ta llevando a términu n’otres comunidaes autónomes. Concha Masa, diputada d’IX, aseguró que ye hora de devolver los derechos retiraos al profesoráu tantu de Primaria como de Secundaria como una midida xusta que significa reponer les condiciones llaborales de 2012 y porque repercute na calidá de la enseñanza pública, en cuestiones bien importantes como la inclusión y l’atención a la diversidá. “Estes postreres son cualidaes fundamentales na educación pública”, esplicó la diputada d’IX na rueda de prensa de presentación de la Proposición Non de Llei al pie de la diputada de Podemos Lucía Montejo.

La diputada de Podemos esplicó qu’anque l’aumentu del horariu lectivu ye frutu d’un Real Decreto-Llei de 2012, del Gobiernu de Rajoy, la comunidá autónoma tien marxe d’acción para ameyorar los horarios lectivos y para revertir el fechu de que los maestros y profesores asturianos tengan les peores condiciones llaborales de tol estáu. La midida tamién sirviría para crear cientos de puestos de trabayu na enseñanza, más de 800 puestos, solo en Secundaria, según los datos que remana. Montejo tamién señaló que comunidaes como Andalucía, con un Gobiernu socialista yá llevaron a cabu midíes similares a les que se proponen n’Asturies.