IX quier que la universidá pública sía totalmente gratuita

Educación pública totalmente gratuita dende la infancia hasta la universidá, incluyendo llibros y los servicios de comedor y tresporte,  ye la propuesta principal educativa que va llevar Izquierda Xunida (IX) nel so programa pa les elecciones xenerales del próximu 20 d’avientu. IX sostién que ye posible asegurar una educación superior gratuita si se detrái un 25% del financiamientu de los gastos militares, amás de dexar de financiar a la Ilesia católica, nun se paguen los intereses “ilexítimos” de la delda y llúchase contra’l fraude fiscal.

“Una universidá pública gratuita ye posible. Si lo ye en países de Llatinoamérica, por qué nun va ser lo equí”, defendió esti llunes na presentación de les propuestes el responsable d’Educación d’IX, Enrique Díez, vistíu, como casi tolos presentes, cola camiseta verde, iconu de la marea ciudadana  contra los retayos n’educación. Esi oxetivu, el d’una universidá pública gratuita, algamaríase de forma “progresiva”, diz el programa, empezando colos graos. Sía que non, “va garantizase, con calter inmediatu, que les tases universitaries nun sían cimeres a les de les anteriores llexislatures”.

IX propón que la inversión del 7% del PIB n’educación tea blindada na Constitución —agora ye’l 4%— y plantega que la próxima llei educativa —tres la derogación de la LOMCE, como se comprometieron tolos partíos salvu’l PP— sía aprobada en referéndum polos ciudadanos. L’ampliu paquete de midíes de la federación d’esquierdes inclúi una llende máxima de 20 alumnos per clase en primaria y secundaria, la supresión de la escuela alcordada nun plazu de seis año y que la relixón quede dafechu fuera del ámbitu escolar. La formación quier que la educación sía d’ufierta obligada hasta los 18 años y acompaña les sos propuestes d’una memoria económica na qu’esplica d’ónde llograría’l financiamientu.