IX denuncia l’expoliu de les Beques Erasmus

IX denuncia que’l gobiernu “Expolia” a miles d’estudiantes les Beques Erasmus’ “dexándo-yos tiraos nel estranxeru na más absoluta indefensión” y llama al alumnáu a revelase nes redes sociales. Les árees federales de Mocedá y Educación d’IX denuncien que “Wert, nel so enfotu de prosiguir el so valtamientu sistemáticu de la Educación Pública, aprueba otru nuevu retayu que dexa en precariu los estudios de miles de mozos y esgaña entá más los pocos recursos económicos colos que cuntaben pa encarar un cursu yá empecipiáu”.

Izquierda Xunida, al traviés de la so árees federales de Mocedá y d’Educación, denuncia la maniobra y l’espoliu escurríos pol ministru d’Educación, José Ignacio Wert, pa “esaniciar a metá del cursu la conocida como ‘beca Erasmus’ a decenes de miles d’estudiantes que tán nel estranxeru, a quien se-yos garantizara esta ayuda, dexándo-yos agora tiraos na más absoluta indefensión y precariedá”. IX esixi al Gobiernu del PP que se caltengan estes beques pa universitarios que nun reciben la beca xeneral. Al tiempu, anima a que lo/as afectaos collaboren en #salvemosErasmus al traviés de Twitter y sofitando la iniciativa de recoyida de firmes (http://goo.gl/ApFx1t) que yá ta en marcha.

Pa les árees de Mocedá y Educación d’IX “nun ye de recibu la última orde ministerial que Wert, actuando con nocturnidad y alevosía, sacóse de la manga pa esaniciar de golpe miles d’ayudes a estudiantes, endureciendo les condiciones por qu’apuerten a suplementos de les beques Erasmus’”.

L’Estáu español ye dientro de la Unión Europea’l que más estudiantes tien acoyíos al programa de movilidá Erasmus, con cerca de 36.000 moces. La Orde ECD/1997/2013 añede un nuevu requisitu pal llogru del suplementu de la beca Erasmus’, qu’hasta agora yera apurrida pol Estáu, consistente en convertir n’indispensable llograr el cursu anterior una beca de calter xeneral.

Dende IX, animen a que l’alumnáu participeal traviés de les redes sociales, con grupos que tán surdiendo al traviés de Facebook (http://goo.gl/Uo1w3W), twitter (salvemosErasmus) o al traviés de la recoyida de firmes de Change.org (http://goo.gl/ApFx1t)