Una investigación amuesa nes Xornaes de l’ALLA que los equipos direutivos de los centros de primaria son enforma favoratibles al asturianu

Más d’un 80 por cientu del personal direutivu de los colexos públicos d’Asturies na etapa educativa de primaria son dafechamente partidarios de la estensión, presencia y valir educativu de la Llingua Asturiana, según dexa afitao l’estudiu que presentara ayeri Isabel Hevia Artime, de la Universidá d’Uviéu, na primer Xornada de les XXXII Xornaes Internacionales d’Estudiu entamaes pola Academia de la Llingua Asturiana. Col títulu de “Valor cultural y educativu de la llingua asturiana”, la ponencia amosó los resultaos d’una investigación desendolcada en 148 de los Centros Públicos d’Asturies onde s’imparte enseñanza primaria.

Los datos qu’amuesa la investigación d’Isabel Hevia son dafechamente positivos sobro la importancia de la llingua asturiana na educación y desen bien a les clares que la inmesa mayoría del profesoráu responsable de los centros ye partidariu d’una mayor presencia de la llingua asturiana nel currículu.

La ponencia d’Isabel Hevia peslló la xornada de la tarde d’ayeri qu’entamaba a les 16 horescpm una ponencia sobre “Nuevas perspectivas en Sociología del lenguaje y lenguas minoritarias” d’Amado Alarcón de la Universidfá Rovira i Virgili, que dió pasu a les primeres comunicaciones del programa: “Una cuestión de terminoloxía xuridica”, de Nicolás Bartolomé Pérez; que faló del emplegu del términu conceyu nel ámbitu institucional asturianu; “Tratamientu del monollingüismu asturianu nel curriculu d’Asturies”, d’Iris Díaz Trancho; que se cincaba a contratar esi tratamientu col que reciben les llingües propies notres comunidaes autónomes del Estáu Español, “L’asturianu y les nueves tecnoloxíes: datos d’una encuesta d’usos llingüísticos” d’Inaciu Galán y González; con datos averaos a una encuesta fecha a 593 persones sobre los sos usos llingüísticos nes redes sociales; “La comunicación audiovisual y multimedia en llingua asturiana” de Próspero Maanuel Morán López, que faló del coste de oportunidá que representare l’arrenunciu políticu a desendolcar una política audiovisual asemeyada a la de les demás comunidaes autónomes con llingua propia, y “Percepciones y conciencia del asturianu en dellos estudiantes d’español pa estranxeros de la Universidá d’uviéu”, de Marta Mori y María Prieto, qu’amosó les rempuestes, enforma positives, de los estudiantes d’español como llingua estranxera na Universidá d’Uviéu a la so esperiencia de contautu cola llingua asturiana na vida cotidiana.

El programa del miércoles

Güei miércoles 6 nel salón d’actos de la Facultá de Filosofía y Lletres de la Universidá d’Uviéu celébrase la segunda sesión de les XXXII Xornaes Internacionales d’Estudiu entamaes por esta Academia.

Les sesiones d’esta tarde entamarán cola ponencia del miembru d’esta Academia Xosé Bolado titulada «Al ritmu de los díes de la vida propia. Una mirada circunstancial sobre poesía nueva». Darréu la sesión continuará cola llectura de les comunicaciones del tamién Académicu Xosé Ramón Iglesias Cueva, siguíu de los profesores David Guardado, Andrés Martínez Vega, Raquel Cuétara, Xuan Santori Vázquez, Pablo Suárez García y Pablo Rodríguez Medina.

La xornada pesllará cola ponencia titulada «Pepín de Pría y sus apostillas al Vocabulario de Rato y Hevia. Más apuntes para su Diccionario perdido» a cargu de la profesora Beatriz Hernán-Gómez Prieto de la Universidá degli Studi de Milán.