IX defende a l’ALLA como entidá pública del Principáu

El grupu parlamentariu d’IX va defender na Xunta Xeneral un cambéu de la Llei d’Academies del Principáu pa que la Academia de la Llingua Asturiana configúrese como una entidá pública del Principáu d’Asturies, adscrita a la conseyería competente en materia de Cultura, con personalidá propia pal exerciciu de les sos funciones con autonomía orgánica, funcional y presupuestaria y que’l so personal llaboral indefiníu caltenga’l conxuntu de los sos derechos llaborales activos.

Esta yera la iniciativa que presentaben esti miércoles pela mañana’l voceru parlamentariu d’IX, Gaspar Llamazares, y la diputada responsable d’Educación, Concha Masa, y significa “otorgar seguridá a l’Academia, una reconocencia propio y similar al que tien l’Academia Valenciana de la Llingua”, sigún asoleyaba IX na so web esti día.

El cambéu de la Llei pretende dar respuesta a les dificultaes surdíes, dempués de 30 años d’esistencia de l’Academia y una ventena d’ellos de la promulgación de la Llei d’Academies asturiana,  con un cambéu nel criteriu de la Intervención del Principáu que lu considera una entidá cuasi privada, non financiable directamente pol Gobiernu autonómicu, sinón subvencionable como si fuera una ONG. IX yá intentó al traviés d’un cambéu de la llei de presupuestos revertir esta situación y apunta que mientres tou esti tiempu los presupuestos de l’Academia fueron visaos y sofitaos pola Sindicatura de Cuentes.

Llamazares recordó esti día na ruda de prensa que’l problema presupuestariu, qu’a puntu tuvo de provocar el desahuciu de l’Academia de los actuales locales, sorteóse pero’l problema políticu ten de ser solucionáu: “Nun puede asimilase l’Academia nin a una ONG nin a otres academies que nun tienen funciones de calter públicu, y ha facese alcordanza que dende la constitución de l’Autonomía forma parte del so articuláu institucional”, alvirtió Llamazares, qu’esixó al mesmu tiempu la reconocencia institucional de l’ALLA.

IX caltien negociaciones col restu de los grupos pa sacar alantre esta iniciativa que pretende terminar cola inseguridá de la principal institución de la llingua asturiana. “El nuesu oxetivu ye buscar el consensu con tolos grupos porque l’Academia ye una entidá al serviciu de los asturianos”, esplicó Concha Masa demientres la so intervención. La iniciativa d’IX significa caltener el personal de l’Academia, dalgunos d’ellos con una antigüedá de 30 años, al traviés d’una alternativa similar a la utilizada col personal del Hospital Grande Covián, de Les Arriondes.