Iniciativa pol Asturianun denuncia que RTPA prohibe usar hasta la pallabra “argayu” a los sos trabayadores

La dirección de la RTPA emitió un documentu que según Iniciativa pol Asturianu “llega a la llocura de nun permitir l’usu de términos como “argayu” y que pon toles torgues posibles al emplegu de la toponimia oficial”. La organización denunciante afirma que ta acabante conocer la esistencia d’un documentu unviáu a los sos trabayadores de la Radiotelevisión del Principáu d’Asturies “onde s’impide l’usu del asturianu”. Nel documentu oblígase a los trabayadores a castellanizar términos como “argayu” y a tratar a pallabres asturianes como “el campanu” como si se trataran d’estranxerismos, obligando a ponelos ente comines.

Como “tovía más graves” califiquen les indicaciones que faen pa col usu de la toponimia. La dirección de la RTPA ordena nesti documentu dar pasos atrás nel usu de los nomes de llugar na canal, asina, obliga a los trabayadores del Ente a nun usar los topónimos asturianos de los conceyos, pesie a que la Llei d’Usu del Asturianu de 1998 espifica que los topónimos oficiales son los asturianos, na so forma tradicional, espliquen dende Iniciativa pol Asturianu, organización que califica esti fechu como “especialmente indignante pues produzse pocos díes dempués de que’l director de la TPA escribiere una carta a la Xunta pola Defensa de la Llingua Asturiana comprometiéndose a respetar la toponimia oficial y a promocionala, mientres al mesmu tiempu unvía a los sos trabayadores un documentu nel que pon toles torgues posibles pal so usu”.

Pa Iniciativa pol Asturianu “ye una tomadura de pelos a los asturianos y una falta de respetu pola llingua que falen una parte importante d’ellos y que ye patrimoniu de tola sociedá asturiana”. Amás, la RTPA sáltase la llegalidá vixente y vien usando cada vegada menos l’asturianu nes sos emisiones, pesie al mandatu que fai l’Estatutu d’Autonomía d’Asturies de “esparder l’usu del asturianu nos medios de comunicación” y pesie al ésitu d’audiencia que tuvieron siempres toles emisiones que fizo la canal nesti idioma.

Dende Iniciativa pol Asturianu afirmen amás “que nun ye la primer vegada que se-y impide a dalgunos trabayadores d’esta canal usar l’asturianu, pesie a tar formaos munchos d’ellos pa facelo”. Pa esta asociación “sedría muestra de bona voluntá per parte de la canal que dexaren usar l’asturianu a aquellos profesionales que quieran facelo”, que, según afirmen “nun son pocos”.

Iniciativa pol Asturianu esixe a la RTPA qu’incluya más programación n’asturianu, porque dende esta organización “nun s’entiende que yá paguemos por una televisión pública en castellán -TVE- y tengamos que pagar una segunda, ensin cuntar con medios públicos na nuesa llingua”. Dende la organización entienden que “una televisión pública asturiana nun tien sentíu si nun ye pa da-y usu a la llingua asturiana nes sos emisiones”.