Iniciativa felicita a Foro por querer da-y solución constitucional al asturianu

Iniciativa pol Asturianu felicita a Foro Asturies por reconocer la necesidá de da-y solución constitucional al asturianu, resaltando que con esta realidá ye’l momentu d’entamar a sentase y falar de los posibles pasos a siguir nuna reforma estatutaria.

Dempués de la celebración del IV Congresu de Foro Asturies, Iniciativa pol Asturianu quier amosar la norabona de la organización por esi pasu alantre en defensa de la pluralidá llingüística y por recoyer nos Estatutos del partíu el reconocimientu a les llingües propies d’Asturies y por reconocer tamién la necesidá de da-y solución constitucional al asturianu. Fízolo esti miércoles nuna nota de prensa na que fizo alcordanza del posicionamientu recién de la organización nel so congresu de refundación.

Pa la entidá, ye una bona noticia qu’esti partíu recupere esa defensa del asturianu, recoyéndolo amás na norma cimera interna del partíu, y que dempués d’un tiempu d’indiferencia y confrontación col idioma, torne una postura asemeyada a la que se tenía nos entamos del partíu.

Iniciativa pol Asturianu recuerda amás que “nel trabayu que’l conxuntu de la sociedá y los axentes sociales y políticos tenemos por delante nun sobra naide, polo tanto, ye mui bona noticia ver como Foro Asturies recupera esi respetu a la cultura y a les llingües d’Asturies”.

P’acabar, la organización fai un llamáu a tolos partíos “a sumase a esti mayoritariu consensu constitucional y a ser conscientes de que con esti cambéu y con esta realidá ye’l momentu d’entamar a sentase y falar de los posibles pasos a siguir nuna reforma estatutaria y nun perder más tiempu”.