Portada Música Hevia ufre versiones de munchu valir musical nun espectáculu al que-y falta propuesta multimedia

Hevia ufre versiones de munchu valir musical nun espectáculu al que-y falta propuesta multimedia

by asturnet

Depués del arranque que los Waterboys dieron al festival cola so propuesta rock pernomada, el gaiteru asturianu más popular ufrió un montaxe que arrampla colos meyores eloxos no musical y coxea nel ámbitu multimedia, dafechamente na tradición de los músicos asturianos que faen los mayores esfuercios na parte músical d’estes propuestes dexando’l restu menos trabayao. Versiones de tangos, boleros y pieces populares tan perguapamente arreglaes cola gaita midi ficieron olvidar al públicu los apuntes gráficos y orales que pretendíen facer de mistura y tendríen de meyorase.

José Ángel Heviaamosó nesti espectaculu entituláu “Remis: un gaiteru universal” lo qu’un perbon músicu como elli pue facer xunto a la so banda habitual, acompañada esta vegada por una sección de metal que s’afayaba con resultaos perbonos en pieces americanes. Hevia amosó como enfrentase a la interpretación de música popular americana con una gaita con “El Manisero” o el tangu “Por una Cabeza” de Carlos Gardel y bordó tamién l’arreglada Alfonsina o esi boleru universal “Bésame Mucho” que allumó’l camín entamáu primero pola popular “A la mar fui por naranjas”.

Col enfotu de revivir la xira llarga que José Remis Ovalle fizo a mediaos del sieglu pasáu cól títulu de “Gaiteru Mayor d’España” embaxo’l brazu, semeyes inédites de Remis Ovalle y la so vida musical de romería en romería y tocando per toa América, foro faciendo d’engranaxe d’un espectáculu al que-y chamos a faltar un multimedia más averáu a les téuniques recientes y un ritmu más rápidu nos momentos del conciertu que les pieces lo pidíen.

El montaxe finó cola Bagad de Locoal Mendon como artistes invitaos del conciertu pa tocar los éxitos de Hevia n’Europa y un sólu del maliayu que dexó bien a les clares el dominiu pergrande que tien de la téunica que ficiera famosu a Remis.

Tamién te podria gustar