‘Hable con ella’ ye la única española ente les 100 meyores películes del sieglu

Hable con Ella de Pedro Almodóvar ye la única cinta española escoyida tres una encuesta a críticos cinematográficos de la BBC pa conocer les 100 meyores películes d’esti sieglu.

Los responsables de BBC Cultura preguntaron a un total de 117 críticos de 36 países distintos. A cada unu d’ellos dexóse-y presentar un total de diez películes qu’en total sumaron 599 títulos, de los cualos fíxose un ranking coles más votaes. La resultancia foi una llista de 100 películes (102 por causa de los empates) encabezaos pola surrealista cinta de David Lynch Mulholland Drive, siguida de cerca por Deseyando Amar, del director asiáticu Wong Kar-wai.

La película de Almodóvar, protagonizada por Javier Cámara y Leonor Watling, algamó’l puestu vixésimoctavo na llista, superando a cintes como Ciudá de Dios de Fernando Meirelles o Amor de Michael Haneke, ente otres. Amás, destaquen na llista el directores Wes Anderson, Apichatpong Weerasethakul, Christopher Nolan, Michael Haneke, Paul Thomas Anderson y los hermanos Coen, toos ellos con tres cintes nel ránking.

Según esta votación, 2012 asítiase como l’añu col cine más popular (axunta un total de 10 títulos) y destaquen l’ausencia de grandes blockbusters como la triloxía d’El Hobbit, la saga Harry Potter o Pirates del Caribe, y les películes de superhéroes, que namái cunten con una representación (El Caballeru Escuru de Christopher Nolan).