Gascona celebra’l domingu la II Feria de Quesos Artesanos d’Asturies

El conceyal de Turismu, Rubén Rosón presentó esti miércoles en dependencies municipales la II Feria de Quesos Artesanos d’Asturies sol lema “Quiero Ques-arte” que se va celebrar esti domingu, 19 de xunu, a partir de les 12 na cai de Gascona d’Uviéu. L’eventu va ufiertar, al igual que na so edición anterior, la única fondue del mundu fecha puramente con quesos artesanos asturianos.

Na presentación del miércoles acompañaron al conceyal Francisco A. Colunga, Presidente de l’Asociación de Sidreríes de la Cai de la Gascona ya Isaura Souza, Presidenta de l’Asociación de Queseros Artesanos d’Asturies. El conceyal de Turismu empezó la so intervención estimando a l’Asociación de Sidreríes de Gascona y a la de Queseros Artesanos el so trabayu y el fechu de que “feries como ésta asitien a Uviéu nel mapa de lo meyor de la gastronomía y los productos asturianos”. Tamién destacó la collaboración “ente l’Alministración pública y les entidaes privaes” a la de poner en valor los nuesos quesos.

La Feria va cuntar cola presencia, como cocineru oficial de la gran fondue, de Christian González, chef y figura televisiva amestada a TPA. La fondue, realizada puramente con quesos artesanos d’Asturies, va acompañar de panes de maíz con pipes y de trigu con pases y nueces, teniendo en cuenta tamién a les persones celiacas. Al igual que n’otres prebas que se realicen en Gascona, el públicu asistente, por aciu l’alquisición -por 5 euros- d’una cazuela de folla de doble concu (diseñada puramente pal eventu) va poder tastiar de la fondue.

“Les 23 queseríes de l’Asociación de Queseros Artesanos del Principáu d’Asturies van ufiertar a la vienta más de 80 variedaes de quesos, nos puestos instalaos a lo llargo de la cai de la Gascona y collaboren con 110 kg de materia primo pa la fondue”, indicó Isaura Souza.  Dende’l xueves hasta’l domingu de feria, los hosteleros de la cai Gascona van ufiertar a los sos veceros les xornaes gastronómiques de la cocina de los quesos Artesanos d’Asturies. El presidente de l’Asociación de Sidreríes de Gascona convidó a tolos uvieinos, asturianos y turistes a pasase por una feria que yá na so primer edición foi un ésitu y esperamos que tamién lo sía nesta segunda”.