Felpeyu presentó en Llangréu les sos últimes composiciones

El grupu Felpeyu visitó Llangréu esta fin de selmana pa poner conciertu’l vienres a les 20:30 hores nel Nuevu Teatru La Felguera y presentar les sos nueves composiciones. Felpeyu ye un grupu de referencia de la música asturiana, fundáu en 1991 vien desarrollando la so carrera musical con munches actuaciones d’exitu per España, Europa y Australia.

Felpeyu trabaya col fondu musical tradicional asturianu creando un discursu musical personal, potente y actual, basáu na reellaboración de cantares populares y pieces instrumentales recuperaes de fontes etnográfiques o compuestes polos sos miembros. El resultáu ye un repertorio sólidu ampliamente aceptáu por crítica y públicu, defendíu n’intensos conciertos en directu por tola xeografía asturiana y española y en países como Canadá, Líbano, Francia, Australia, Italia, Suecia, Dinamarca… Felpeyu revitaliza sones populares al traviés de les sos interpretaciones mediante l’usu d’arreglos de cuerda contundentes que respalden lletres les más de les veces creaes pol propio grupu, atopando asina un términu mediu ente creatividá y tradición, y siempre col envís d’esfrutar faciendo bona música sobre l’escenariu.