Fai! critica que se pongan problemes xurídicos pa evitar l’avance del asturianu na Universidá

Fai! acusa de “falta de voluntá política y cinismu”al equipu rectoral col asturianu Consideren “una hipocresía” l’alegar “problemes xurídicos” pa evitar facer avanzar la llingua asturiana na Universidá y solicita que se garantice la non discriminación de les y los falantes d’asturianu. Porque defender l’asturianu “ye más que facer bolígrafos, taces y camisetes billingües”.

La Comisión de Reforma de los Estatutos de la Universidá d’Uviéu, “controlada mayoritariamente por miembros afines a V.Gotor”, refugó, nel so últimu conceyu la propuesta qu’avalaren los claustrales de Fai! pa que l’asturianu fuere “llingua propia” na Universidá. La Comisión alegó “problemes xurídicos”. Asinamesmo, la mayoría afín al rector refugó otra propuesta transaccional, una adaptación a la Universidá del conteníu de la Llei d’Usu y Promoción, que pretendía dotar de drechos a la comunidá universitaria pa emplegar l’asturianu en forma escrita o na oral dientro d’esta institución.

A Fai! paéz-y qu’en realidá “esiste un problema de falta de voluntá política y compromisu del actual rector cola llingua asturiana”. Pa esta organizacióin, “defender l’asturianu ye muncho más que facer bolígrafos, taces y camisetes billingües”. Y ye que, “a pesar del compromisu anunciáu por Vicente Gotor col asturianu, la situación d’esta llingua dende la so llegada nun fizo más que caltenese na mesma situación desastrosa carecida demientres el mandatu de Vázquez”. La organización d’esquierda estudiantil considera que “lo que se pretende, en realidá ye caltener a la llingua asturiana nuna situación de subdesarrollu y d’infravaloración frente al castellán”.

En cualquier casu, l’equipu rectoral tien demostrao nun saber dar un pasu alantre p’hacia la normalización d’esta llingua. Fai! ve “un exerciciu claru d’hipocresía y cinismu electoral” al refugar, incluso, treslladar les mínimes lleis asturianes a la Universidá. Poro, “non sólo nun s’impulsa la llingua propia dende la Universidá sinón que se pretende reducir la so presencia social”. De fechu, “aléguense problemes xurídicos pa refugar la oficialidá, pero cuando estos problemes nun esisten –adaptaciones de la Llei d’Usu- lo que s’amuesa ye una falta de voluntá col asturianu ablucante y un intentu sistemáticu de topar xides”.

Pa finar, Fai! solicita al Rector que “cumpla les sos promeses electorales y s’implique col desendolcu de garantíes xurídiques que permitan a los asturiano-falantes la igualdá de derechos dientro de la Universidá d’Uviéu, evitando cualquier discriminación por motivos llingüísticos” dientro de la institución que dirixe.

Fai! cunta anguaño con representación nel Claustru de la Universidá d’Uviéu y una y otra vuelta vien solicitando a esti equipu rectoral que tope soluciones pa integrar académicamente la llingua asturiana en titulaciones como Maxisteriu o Filoloxía, asina como pa garantizar l’usu efectivu del idioma per parte de cualquier miembru de la comunidá universitaria.