Xorrez hasta 2.500 millones d’euros el presupuestu d’Erasmus+ en 2017

La Comisión Europea (CE) anunció esti día que va facer xorrecer los fondos del programa Erasmus+ pa 2017, con un aumentu del 13 %, 300 millones más, hasta los 2.500 millones d’euros.

Estos fondos van destinase a los estudiantes Erasmus pero tamién a profesores, aprendices, voluntarios y nueves propuestes en proyectos deportivos, con prioridá a la inclusión social, afirmó la CE nun comunicáu. El comisariu d’Educación, Cultura, Mocedá y Deporte, Tibor Navracsics, amosóse “satisfechu” cola medría d’estos fondos y dixo que’l programa Erasmus+ “ufierta más oportunidaes que nunca” a los mozos.

El presidente del Executivu comuñal, Jean-Claude Juncker, yá anunciara que dedicaría más fondos a esti programa pal periodu 2017-2020, y destacó la importancia del mesmu pa dar oportunidaes de movimientu, empléu y estudios a los mozos europeos.

Los fondos de 2017 tamién se van utilizar pa implementar el “Cuerpu Européu de Solidaridá”, una iniciativa anunciada por Juncker nel mesmu discursu par promover el voluntariáu de los europeos onde más se precise la so ayuda, con cuenta de responder a situaciones de crisis.