Estrénense les esposiciones de la Selmana de les Lletres Asturianes

Redacción.

Esti miércoles 2 de mayu,a les diez de la mañana, ábrense les esposiciones “La pallabra illustrao” na Casa la Mocedá de Sotrondio y “Hai una ringlera trazada: la narrativa en llingua asturiana de Samartín” en L’Entregu. La primera percuerre la obra gráfica del novelista y dibuxante Miguel Solís Santos, la segunda, nel Teatru de L’Entregu, ye una esposición de la obra gráfica na narrativa asturiana. Dambes dos van tar abiertes hasta’l 17 mayu n’horariu de 10:00 a 13:00 y 16:00 a 20:00 hores.

En Xixón, nel Centru Cultura Antiguu Institutu y a les doce la mañana va abrise la esposición ‘Ello yera una vez… un tiempu de traducciones ( 1974- 2006 )’ Una esposición que va amosar la lliteratura traducida al asturianu dende otres llingües. L’horariu de la esposición ye de 10 a 21 hores de llunes a sábadu y de 10 a 13:30 los domingos y festivos.

Estes esposiciones súmense a la yá inaugurada ‘La Comarca del Cómic’, na Casa la Cultura ‘Marta Portal’ en Nava, que va tar abierta al públicu hasta’l 17 de mayu, n’horariu de 9:30 a 21:30 hores. Cuatros esposiciones abiertes por mor de la XXVIII Selmana de les Lletres Asturianes.