Esti martes fina la primer fase del Intercambiu de Llibros en Xixón

Un añu más, l’Asociación Xuvenil Estudiantes Progresistes y COAPA, col sofitu del Conceyu de Xixón/Xixón al traviés de la so Conceyalíes d’Educación y Mocedá, entama’l Programa d’Intercambiu de Llibros de Testu de Xixón, na que ye yá la so ventiava edición y que fina’l martes la so primer fase.

La iniciativa, que pretende promover un sistema de gratuidá de los llibros de testu ente les y los estudiantes basáu nel intercambiu, desenvolver nos locales del Conseyu de Mocedá de Xixón, con accesu pela Avenida de la Constitución, númberu 45 (Espaciu Astragal).

El XX Programa d’Intercambiu de Llibros de Testu de Xixón ta financiáu pola Conceyalíes d’Educación y Mocedá del Conceyu de Xixón y cuenta cola collaboración del Conseyu de Mocedá de Xixón y del Conseyu de la Mocedá del Principáu d’Asturies.

Oxetivos

• Promover un espaciu collaborativu ente families estudiantes que dexe l’intercambiu de llibros de testu de manera gratuita, funcionando como un recursu complementariu a los sistemes desenvueltos pola Conseyería d’Educación nos centros educativos que siguen ensin cubrir la demanda.
• Contribuyir a xenerar un modelu de desenvolvimientu más sostenible dende perspectives económiques, ecolóxiques y sociales, basáu n’estratexes de reutilización de los llibros de testu y amenorgamientu de borrafes frente a los modelos de “un solu usu” imperantes nos sistemes de consumu.
• Reivindicar la consecución del derechu a la gratuidá de la Educación n’Asturies recoyida na lexislación nacional ya internacional (Constitución Española, Declaración Universal de los Derechos Humanos, Convención de los Derechos del Neñu y la Neña…).
• Dar respuesta, nel ámbitu educativu, a la situación d’emerxencia social na que s’atopen numberoses families de resultes de les polítiques de retayu aplicaes mientres los últimos años poles Alministraciones Públiques.

Fases y feches

El Programa, nel que puede participar de manera gratuita cualesquier estudiante de Xixón y Asturies, estructurase en trés fases:

• Primer fase: recoyida de llibros. Del 2 al 31 de xunetu, de llunes a vienres, n’horariu de 10.00 a 14.00 hores.  Nesta fase va recibise un vale en cuenta de cada llibru apurríu.
• Segunda fase: entrega de llibros (sigue la recoyida).  Del 16 d’agostu al 28 de setiembre, de llunes a vienres, n’horariu de 10.00 a 14.00 hores n’agostu y de 10.00 a 14.00 y de 17.00 a 19.00 hores en septiembre.  Mientres esta fase vas poder trocar los vales polos llibros que precises, o bien intercambiar directamente llibru per llibru. Ye importante que recuerdes traer contigo la llista de llibros que precises, que vas poder atopar na páxina web del to colexu o institutu.
• Tercer fase: matrícula viva (recoyida y entrega). Del 1 al 15 d’ochobre. Llunes a vienres, n’horariu de 17.00 a 19.00 hores .

Puedes ver el Reglamentu equí

Asociación Xuvenil Estudiantes Progresistes d’Asturies
Centro de Recursos pa Mozos del Conseyu de Mocedá de Xixón
Avenida Manuel Llaneza, 68
33208 Xixón, ASTURIES
infoestudiantesasturias.com