Entamen les fiestes d’Antroxu cola celebración de Les Comadres

L’Antroxu enllena les cais d’Asturies estos díes. Güei munchos conceyos, n’especial la capital de Siero y Xixón acueyen la fiesta de Les Comadres, entamu de dellos díes onde les cais se llenen de color. Mañana vienres, 4 de marzu, en Xixón va facese la llectura del Pregón que va tener llugar a les 20 hores nel Paséu de Begoña, amenizáu un pocu enantes pola Banda de Música de Xixón. Tres el pregón, un pasacais compuestu por charangues llocales va escurrir hasta la Plaza’l Marqués, onde se va proceder, como cada añu, a antroxar la estatua de Pelayo.

L’Antroxu xixonés d’esti añu cunta cola participación de 14 charangues y 36 xarrés a concursu. Como novedá, l’Antroxu estrena un Concursu d’Antroxaos, el sábadu 5 de marzu, sol suxerente títulu de “Los xixoneses na dómina de Xovellanos”. Los traxes tendrán de tener como referencia la indumentaria típica de la dómina na que vivió’l nuesu ilustráu. El concursu va tener llugar a les 21:30 hores nel Paséu de Begoña.

Tamién como vien siendo tradición celebraráse’l domingu a les 12:30 hores el Desfile Infantil d’Antroxaos y a les 16:30 hores va dar empiezu nel Teatru Xovellanos el Concursu Infantil d’Antroxaos.

El llunes 7, el Gran Desfile de Antroxu va rexuntar a miles de participantes percorriendo Xixón dende la plaza Toros, pasando per tola avenida de la Costa y rematando na plaza de L’Humedal. Dempués, la fiesta sigue a les 22:00 hores nel Paséu de Begoña al cargu de Jerónimo Granda y les sos Coples d’Antroxu y más tarde cola Orquesta Alto Standing. El broche final d’estes fiestes va ser el día 8, día nel que s’entierra a la Sardina. A les 17:00 hores, nel Paséu de Begoña va tener llugar el veloriu de la Sardina. El cortexu aciagu va ser a partir de les 19:00 hores y a les 20:45 hores faise l’entierru n’El Muelle. La Tamborrada Charanguera va ser la encargada de despidir esti Antroxu de 2011.