Entama’l procesu d’almisión d’alumnos n’Asturies

Esti llunes, día 15, entamaba ensin incidencies significatives el periodu de solicitú de places pal próximu cursu. La conseyería acababa de publicar el documentu la fin de selmana, con un modelu que les families tendrán d’imprimir y rellenar en casu de que solicitaren cita previa nel colexu escoyíu en primer opción porque deseyen faer el trámite de forma presencial.

Ha facese alcordanza de  que la Conseyería d’Educación dixo nun principiu que tola tramitación sería esti cursu telemática. Énte les protestes de dellos sectores y teniendo en cuenta que n’Asturies se dexen yá munches actividaes presenciales, finalmente abriéronse los dos caminos. Les families pueden faer los trámites nos mesmos colexos o de forma telemática. Magar estos postreros tendrán d’esperar un pocu más pa saber qué documentación tienen de rellenar: según informa la mesma conseyería en Educastur, «el formulariu d’almisión pa presentación telemática va tar disponible a les 00:00 del día 15 de xunu». Esto ye, a la que ábrese’l plazu. Tamién va ser ese mesmu día cuando los colexos publiquen los llistaos col númberu de places que tienen disponible.

Los trámites son especialmente importantes pa los neños y neñes de 3 años que s’incorporen a primeru d’Infantil, esto ye, qu’entren nuevos al sistema educativu. Tamién p’aquellos alumnos que se van a camudar de centru.