Entama’l Cursu de llingua asturiana nel ámbitu de la información y comunicación de la Universidá d’Uviéu

Col mes d’ochobre entamó tamién el primer Cursu de llingua asturiana nel ámbitu de la información y comunicación que desendolca la Universidá d’Uviéu depués de 17 años de cellebrase’l primer cursu d’estes calterístiques n’Asturies. Los 35 alumnos que participen nesti cursu y qu’agotaron les places a los tres díes d’entamar el plazu matrícula ya participaron el vienres n’Uviéu y el sábadu en Xixón nes dos primeres clases.

La Universidá estrénase na convocatoria na formación de periodistes n’asturianu y plantega dos cursos estremaos. El primeru d’ellos entamaba esti 1 d’ochobre y va desendolcase hasta’l 13 de payares baxo la denominación ‘Cursu de llingua asturiana nel ámbitu de la información y comunicación’, con un preciu de matrícula de 81 euros -pero reducíu nun 40 por cientu acordies con una subvención de la Dirección Xeneral de Política Llingüística’l Principáu-.

Dirixíu por los profesores universitarios Xulio Viejo y Ramón D’Andrés, el cursu empobínase preferentemente a periodistes titulaos o profesionales de los medios de comunicación con esperiencia, ya incorpora conteníos de gramática, rexistros comunicativos y asturianu faláu y escritu, con Pablo Texón, Xosé Nel Comba y Fernando Álvarez Balbuena como profesores.

El segundu de los monográficos denomínase ‘Cursu especializáu de comunicación audiovisual nes situaciones de minorización llingüística’ ya impartiráse del del 26 de payares al 22 de xineru, con una matrícula de 81 euros que podrá formalizase entá en feches prósimes: del 29 d’ochobre al 11 de payares. Ente los docentes qu’exercerán de profesores nel cursu -que quier formar a periodistes nel usu d’asturianu en radio y televisión- figura Próspero Morán, director d’Asturnews, que participa nel monográficu en calidá de profesor de la Universidá Carlos III de Madrid.

Les 30 hores llectives de caún de los cursos impartiránse na tarde de los vienres na Facultá de Filoloxía d’Uviéu y los sábados pola mañana nel Antiguu Institutu de Xixón.

Programa de los cursos na web de la Universidá d’Uviéu