Entama la campaña escolar pal asturianu

Un venti por cientu de les places d’interinos ensin cubrir son de Llingua Asturiana, colo qu’entama otru cursu escolar nel que sindicatos como SUATEA tienen de facer como davezu’l llamamientu añal pa que na campaña de matriculación nun haya falses informaciones.

Según los datos qu’ufría SUATEA nel entamu del repartu d’interinidaes, del centenar de places ensin cubrir, polo menos venti correspuenden a l’asignatura de Llingua Asturiana, polo qu’esi mesmu númberu de centros educativos nun va cuntar con mayestros de l’asignatura hasta como poco’l día 15 de setiembre, cuando se camienta que la Conseyería fadrá la segunda convocatoria.

SUATEA, que diz atalantar qu’hai motivos namái qu’económicos nesta anomalía, entamará darréu tamién la campaña de tolos años pa garantiza-yos a los pás de neños que quieran ser escolarizaos en llingua asturiana que nun hai denguna torga alrodiu de l’algame de grupos mínimos pa poer estudiar l’asignatura.