Enllantar Educación Física en Mieres supón invertir un millón d’euros

Enllantar Educación Física en Mieres supón invertir un millón d’euros, mentantu que facelo en Xixón o n’Uviéu costaría ente siete y ocho, sigún dixo’l rector esti miércoles en Barredo, alrodiu de les Xornaes d’Innovación Docente.

L’alderique abiertu desque’l rector de la Universidá d’Uviéu, Santiago García Granda, indicara,  que se taba embaraxando enllantar esta titulación nel campus de Mieres, esclariolu’l máximu responsable de la institución académica ayeri, en Barredo, diciendo que se trata d’un asuntu complexu. Sobre la mesa hai dos proyectos con una diferencia sustancial n’una de les partes fundamentales pal so desenvolvimientu. “En Mieres, onde yá tenemos les instalaciones, desenvolver estos estudios supondría una inversión d’un millón d’euros y n’Uviéu, ente siete y ocho”.

Tratase d’unu de los argumentos fundamentales p’apostar pol campus mierense. El rector, ello ye que nunca despintó la so predilección por esta opción, pero aportuna en que  se tan estudiando toles opciones.  García Granda señaló que «”nda nun se pue dicir ónde lo vamos a enllantar nin siquier cuándo lo vamos a faer”. Pero adelantró que tendría que materializase nel plazu d’un añu, ya indicó’l costu añal del so caltenimientu, que van ser unos 200.000 euros al añu.

Oficialmente, señaló qu’hai dos proyectos y una intención. El proyectu d’Uviéu ta en fase de desenvolvimientu y atópase na so última etapa. La primer propuesta presentarala a principios de branu la Facultá Padre Ossó, centru adscritu a la institución académica asturiana, que yá nel so día foi pioneru n’enllantar la especialidá d’Educación Física nos estudios de Maxisteriu. La segunda, plantegarala la Facultá de Formación del Profesoráu y Educación.