El Texu de La Collá aconceyó a los colectivos esmolecíos pol futuru del árbol sagráu de los ástures

Redacción.

Esti sábadu pasáu, na parroquia de La Collá, nel conceyu de Siero, la Tertulia Cultural El Garrapiellu organizó la IV Xuntanza del Texu de La Collá en collaboración con otres organizaciones ya incluyendo pela tarde’l II Conceyu del Texu, nel que la que participaron organizaciones ecoloxistes d’Asturies, axuntaes pola esmolición por esti árbol, de gran simbolismu espiritual n’Asturies.

L’actu entamó pela mañana col soníu de les gaites y l’homenaxe del pueblu de La Collá y de les organizaciones representaes al Gaiteru de Veriña, que collaboraba cada añu con esti actu nel Texu de La Collá. La so muyer, fíu nuera y ñeta tuvieron presentes nel actu nel qu’Ánxel Nava fizo alcordanza de la figura del celebre gaiteru.

Darreu la misa n’asturiana, organizada pol Coleutivu Manues Fernández de Castro, enllenó les ruines de la Ilesia Vieya de La Collá, quemada pol bandu republicanu na dómina de la guerra, de la voz de Mari Luz Cristobla Caunedo y la gaita Milio Trabanco, acompañáu pol tambor de Pedro Pangua. Na ceremonia volvió a recordase la figura del Gairteru Veriña y aprovechóse pa facer alcordanza de la figura de Don Bernardino, parrocu de La Collá que siempres collaboró con esta Xuntanza y que morrió l’añu pasáu d’un cáncanu, dempues d’un tiempu apartáu de los sos llabores na parroquia.

Dempues de la misa, l’actu garró un calter festivu y baillóse alredore del texu la Danza Prima, mientres s’entonaron Sampedraes. Entamó la danza Milio’l del Nido y Mari Luz Cristobal. Al meudía fízose una xinta embaxo’l texu.

Yá pela tarde celbróse’l II Conceyu del Texu nel que se pidió la declaración de los texos ‘cultos’ y de los texedales como Patrimoniu de la Humanidá. Amás volvió a recordase la necesidá de que’l Texu de La Collá ameyore’l so entornu, sobremanera’l camín asfaltáu que ta secando una parte del árbol. L’actu de pela tarde incluyó un aición del Bardu Errante, figura artística d’Ánxel Nava.

Vidiu de los participantes nel baille embaxo’l Texu de La Collá