El regresu del asesín John Wick estrenos de la selmana

L’actor Keanu Reeves tornó esta fin de selmana con fuerza a la cartelera na piel d’un asesín a sueldu na remortina de John Wick, el papel que-y devolvió la fama tres años ensin nengún ésitu cinematográficu.

Coles mesmes, ente los estrenos destacaos d’esta selmana atopamos tamién la comedia dramática L’alta sociedá, con Juliette Binoche y la comedia francesa A fondo.

John Wick, l’asesín qu’encarnó Keanu Reeves nel 2014, vuelve a la pantalla pa responder a una delda con un antiguu sociu de la organización a la que’l protagonista perteneció mientres años. Nesta remortina, dirixida tamién por Chad Stahelski, el llexendariu criminal viaxa hasta Roma pa lluchar contra los más peligrosos del mundu.

La cineasta Maria Schrader llevaba tamién esta fin de selmana a los cines un drama históricu qu’ella mesma escribió al pie de Jan Schomburg y que se centra na vida de Stefan Zweig (1881-1942), l’escritor, biógrafu y activista social austríaco d’orixe xudíu que tuvo que fuxir del so país pol réxime nazi. El filme amuesa les dificultaes que tuvo qu’encarar Zweig, que tuvo qu’abelugase en París y más tarde en Londres, hasta terminar fuxendo cola so esposa a Suramérica, onde se suicidó en 1942 por causa de un tarrecible mieu a que’l nazismu estender por tol mundu.

L’ALTA SOCIEDÁ

Coproducción francu-alemana ambientada nel branu de 1910 que se centra na solmenada vida de dos families que se van ver arrodiaes d’un halu de tracamundios arriendes de les misterioses desapaiciones de dellos turistes na mariña’l norte de Francia. Empobinada por Bruno Dumont, tamos ante una comedia dramática con Juliette Binoche como protagonista, que consiguió tar na sección oficial de llargumetraxes a concursu del Festival de Cannes.

A FONDO

Comedia francesa empobinada por Nicolas Benamou que se centra nuna familia que se dispón a empezar les sos vacaciones de branu y va atopase con dellos “problemines”. Tom, el padre, afai’l control electrónicu de velocidá del so nuevu coche por que circule a 130 kilómetros per hora mientres tol viaxe, pero nun va atopar la forma de frenar el vehículu cuando, tres un discutiniu, decide atayar la marcha.