El Principáu camienta que nun ye momentu pa pensar na FP Dual

El Principáu camienta que nun ye momentu pa pensar na FP Dual por mor de la situación esceicional xenerada pol confinamientu, ente otres coses porque ye imposible realizar la formación n’empreses riquida.

Les alministraciones viéronse obligaes a camudar les circunstancies de final de cursu y eso pasó por suprimir el módulu de la Formación en Centros de Trabayu, por más que los alumnos amosaren el so refugu a esa situación. Y eso afecta tamién a la FP Dual. Ello ye que les instrucciones oficiales yá anunciaron que los alumnos que tuvieren cursando nun podríen titular na modalidá dual. Porque ye imposible realizar la formación n’empreses riquida.

El director xeneral d’Enseñances Profesionales, Javier Cueli, impartió esta selmana pasada una charra telamática sobre ‘El modelu actual de la FP Dual n’Asturies. Perspectives de Futuru’, na Cámara de Comerciu de Xixón. Y mientres casi dos hores, Cueli tuvo oportunidá d’esbillar l’importante papel que la FP polo xeneral, non solo la Dual, xuega na enseñanza y el mercáu llaboral. Pero tamién almitió de que «l’añu que vien nun va ser momentu pa pensar na FP Dual». Esto ye: enagora, esa modalidá queda suspendida.

Asina se punxo de manifiestu mientres la mañana, na xunta ‘online’ de la Comisión de Formación Profesional de la Conferencia d’Educación. Más allá d’eso, el director xeneral esplicó que participen na Dual el 6% de los estudiantes de Formación Profesional d’Asturies y que na previsión más optimista podría llegase al 20% nos próximos años. Non más. A entrugues de los asistentes almitió tamién que «nun esiste» coordinación ente los centros de formación y los de trabayu pa da-y al alumnu la meyor enseñanza. «Ye’l talón d’Aquiles del sistema, nun consiguimos ameyorar la relación que tenemos y eso estrémanos d’otros países europeos».