El PP plantega les Fuerces Armaes y la bandera d’España como materia escolar

El derechu y el deber de defender a España, el significáu de los símbolos nacionales como la bandera, l’escudu y l’himnu, el derechu a la seguridá y el retu de les nueves amenaces van poder formar parte a partir del cursu que vien de lo que los escolares estudien en clase.

En virtú d’un alcuerdu que roblaron los ministerios d’Educación y Defensa va desenvolvese esti proyectu que desplicó’l titular d’Educación, Íñigo Méndez de Vigo, demientres l’actu de la firma celebráu esti vienres. Méndez de Vigo cree que va sirvir pa “ameyorar la conocencia de la seguridá y la defensa” nos centros escolares y pa que los alumnos sepan el “perimportante papel” de les Fuerces Armaes.

La intención ye incluyir estos conteníos nos temarios de Valores Sociales y Cívicos (primaria) y de Valores Éticos (secundaria). Son los dos asignatures que sustitúin a Educación pa la Ciudadanía y que los alumnos pueden escoyer como optativa frente a Relixón, como recueye la reforma educativa del PP, la Lomce.