El Plan Piloto del asturianu ampliarase l’añu que vien

El conseyeru d’Educación y Cultura, Genaro Alonso, fizo esti llunes l’anuncia de que va ampliase’l el Plan Piloto Esperimental de Promoción del Usu del asturianu a otros dolce centros el cursu que vién.

El Conseyeru anunció na cuenca del Nalón que, viendo’l bon aprovechamientu, el so departamentu espera ampliar nel cursu 2018/2019 el Plan Piloto Esperimental de Promoción del Usu del asturianu. L’anuncia diola na so visita al Colexu Públicu El Bosquín, en Samartín del Rei Aurelio, onde’l Gobiernu reconoció’l calter pioneru del centru na implantación del plan piloto esperimental de promoción y usu del asturianu en cuartu de Primaria col allugamientu d’una placa.

El proyectu púnxose en marcha nel entamu d’esti cursu en seis colexos qu’imparten en llingua asturiana una de les dos sesiones selmanales de Ciencies Naturales, Ciencies Sociales, Educación Artística o Educación Física. El Plan ye voluntariu tantu pa centros como pa families y asegura la evaluación y l’alquisición de les conocencies en castellán.

La Conseyería d’Educación tien previsto instalar plaques conmemorativas nos otros cinco colexos que se sumaron a esti Plan: Colexu Públicu Bernardo Gurdiel (Grau), CP La Carriona (Avilés), CP Santiago Apóstol (Mieres), CP El Cotayo y CP Xentiquina (Siero). Sicasí, a partir del cursu que vien la Conseyería espera sumar más centros a estos seis.

Genaro Alonso tamién se refirió al recursu que tien interpuestu’l PP énte’l Tribunal Cimeru de Xusticia d’Asturies contra esti Plan Piloto y dixo qu’espera a conocer la sentencia, pero convencíu de que’l marcu vixente, la Llei d’Usu del Asturianu, dexa la enseñanza d’asturianu y n’asturianu con calter voluntariu.